Cymeradwywyd Lindsy a Tom i fod yn ofalwyr maeth gyda Chyngor Bwrdeistref Sirol Torfaen ym mis Mawrth 2026 ac fe wnaethant groesawi’r plentyn maeth cyntaf ym mis Ebrill 2026. Fe wnaethon ni ddal i fyny gyda Lindsy i glywed am ei phrofiadau maethu yn ystod ei misoedd cyntaf.
Ystyriodd Lindsy a Tom faethu am y tro cyntaf pan oedd eu plant eu hunain wedi tyfu i fyny ac wedi dod yn fwy annibynnol.
“Roedden ni’n gweld eisiau cael plant o gwmpas a gwneud gweithgareddau o gwmpas plant. Ar ôl siarad â rhai gofalwyr maeth, penderfynon ni gymryd y cam cyntaf.”
Wrth fyfyrio ar y broses asesu, dywedodd Lindsy ei fod yn drylwyr ond yn gefnogol.
“Roedd y broses asesu yn syml ac fe wnaethon ni feithrin perthynas dda iawn gyda Tracy, ein haseswr. Pan gawsom ni ein cymeradwyo, Tracy oedd ein gweithiwr cymdeithasol goruchwyliol. Roedd hyn yn wych am ei bod hi eisoes yn ein hadnabod ni’n dda ac yn deall y sgiliau a’r profiad oedd gennym ni i’w cynnig. Roedd yr asesiad yn ymwthiol, ar adegau, ond roedd angen iddo fod yn drylwyr er mwyn gwneud yn siŵr mai ni oedd y bobl iawn i faethu.”
Cyn cael ei chymeradwyo, mae Lindsy’n cyfaddef bod y disgwyliadau oedd ganddi o faethu, yn wahanol iawn.
“I ddechrau, roedden ni eisiau maethu babi neu blentyn dan bump oed, ond nid oedd hyn yn bosibl oherwydd fy mod i’n fêpio. Roeddwn i’n tybio y byddai maethu plentyn hŷn yn golygu y byddai angen cyfnod hir i addasu, a llawer o anawsterau o ran ymddygiad cyn iddynt ymgartrefu. Mewn gwirionedd, cawsom ein paru â phlentyn chwech oed a wnaeth weddu’n syth i’n teulu. Mae’n teimlo fel pe bai hi wastad wedi bod gyda ni.
“Cawsom ni ambell i her o ran ymddygiad, ond gyda maethu, heuo dyn, hynny a fed. Os ydych chi’n ymateb i heriau mewn ffordd amyneddgar a digynnwrf, dyna mae’r plentyn yn ei ddysgu ac mae’n dechrau myfyrio.”
Mae maethu hefyd wedi cael effaith gadarnhaol ar eu teulu ehangach.
“Fel teulu, rydym wedi elwa cymaint mwy ar faethu nag yr oeddwn erioed wedi’i ddisgwyl. Roeddem wedi cyrraedd cyfnod yn ein bywydau lle’r oedd ein plant ein hunain yn gwneud eu pethau eu hunain, ond mae maethu wedi dod â ni i gyd yn ôl at ein gilydd. Rydyn ni’n treulio mwy o amser gyda’n gilydd, yn mwynhau prydau fel teulu, ac yn mynd allan am y dydd gyda’n gilydd. Mae hyd yn oed ein teulu ehangach wedi cofleidio maethu, ac maent wrth eu bodd yn treulio amser gyda’n plentyn bach.”
Un gofid oedd gan Lindsy cyn dod yn ofalwr maeth oedd lefel y cyswllt proffesiynol.
“Roeddwn i’n disgwyl y byddai gweithwyr cymdeithasol yn dod i’r tŷ drwy’r amser ond nid yw hynny wedi bod yn wir o gwbl. Mae yna bob amser rhywun ar ddiwedd y ffôn os oes angen cefnogaeth arnaf, ac mae Tracy yn wych. Mae hi bob amser yn dod yn ôl ataf os oes angen cyngor arnaf.”
Roedd Lindsy hefyd yn gwerthfawrogi’r cyfle i feithrin perthynas gyda’r plentyn cyn i’r lleoliad ddechrau.
“Cawsom gwrdd â’r plentyn cyn iddi symud i mewn gyda ni. Fe wnaethon ni gyfarfod am y tro cyntaf trwy alwad fideo, yna ymweld â fferm gyda’n gilydd, cynnal ymweliad â’r cartref, trip i ganolfan chwarae a chefais gyfle i’w gwylio mewn dosbarth dawns. Fe wnaeth hyn ein helpu i ddod i adnabod ein gilydd ymlaen llaw, a gwneud y broses ymgartrefu gymaint yn haws.”
Pan ofynnwyd iddi am uchafbwyntiau maethu hyd yn hyn, roedd gan Lindsy ddigon o bethau positif i’w rhannu.
“Mae’r anwyldeb mae’r plentyn yn ei ddangos tuag atom yn dwymgalon ac rydyn ni’n cael cymaint o hwyl a chwerthin gyda’n gilydd. Mae’r gefnogaeth gan y tîm maethu, yn enwedig Tracy, wedi bod yn anhygoel ac maen nhw bob amser yno pan fydd eu hangen arnom. Rydw i hefyd wedi gwneud ffrindiau newydd trwy’r ysgol ac wedi cwrdd â llawer o ofalwyr maeth eraill.”
Er bod maethu wedi bod yn werth chweil, mae Lindsy yn sôn yn onest am rai o’r heriau.
“Bu rhai anawsterau o ran ymddygiad ond fel arfer mae rheswm am hyn. Yn aml, mae’n ymwneud â chyffro neu anhawster i reoli emosiynau. Weithiau gall fod yn heriol cydbwyso anghenion pawb, yn enwedig oherwydd y bwlch mawr rhwng oedran y plentyn ac oedran fy merch ieuengaf, sydd dal angen i’w mam fod yno iddi. Fodd bynnag, rydym yn gweithio trwy hyn gyda’n gilydd ac yn sicrhau ein bod yn bodloni anghenion pawb.”
I unrhyw un sy’n ystyried dod yn ofalwr maeth, mae cyngor Lindsy yn syml:
“Ewach amdani! Mae’n hollol werth chweil. Mae maethu yn hwyl, yn werth chweil a gall wneud gwahaniaeth go iawn i fywyd plentyn. Os ydych chi’n meddwl amdano, ewch amdani!”
Os ydych chi’n gallu cynnig cartref neu seibiannau byr i blentyn, cysylltwch â ni i gael gwybod fwy – https://torfaen.maethucymru.llyw.cymru/cysylltu-a-ni/
